Perú, á Inka slóðum

Ferðin hefst í Cuzco höfuðborg Inkanna, en þar má sjá stórkostlegar minjar Inkanna og stórveldi þeirra, sem leið undir lok við komu spánverja til Suður Ameríku.
Frá Cusco er haldið til þorpsins Ollantaytambo sem geymir miklar minjar frá tímum Inkanna og áfram gegnum byggðir bænda í afskekktum dölum Perú, upp í óbyggða dali og fjallaskörð þar sem við munum eiga gönguleiðina alveg fyrir okkur og ekki hitta aðra en bændur með búsmala á beit eða á leið á markaði.
Áfram liggur gangan um Inkastíginn að Sólarhliðinu inn í Machu Picchu, hinnar fornu borgar Inkanna.
Gangan eftir Inkastígnum er af mörgum talin hátindur ferðarinnar og þó við munum ekki hafa stíginn út af fyrir okkur þá er alls engin örtröð á honum þar sem heimamenn passa vel upp á að gefa út hæfilegan fjölda gönguleyfa á stíginn.
Inkastígurinn er án efa ein af frægari gönguleiðum heims en Machu Picchu, sem er líka þekkt sem týnda borgin, var ekki uppgötvuð af umheiminum fyrr en fornleifafræðingurinn Hiram Bingham fann hana árið 1911. Þá höfðu rústir borgarinnar staðir um aldir því hún var byggð löngu fyrir daga hvíta mannsins í nýja heiminum.
Machu Picchu er eins og margar aðrar rústir Inkanna á heimsminjaskrá UNESCO.

16. til 28. maí 2026.
Leiðsögumaður er Vilhjálmur Árnason.
Verð ferðar er 620.000 kr.

Miðað er við 2 í herbergi og tjaldi.  Hægt er að vera einn í herbergi og tjaldi, en greiða þarf aukalega fyrir það 92.000 kr.
Fjöldi í ferð: 10-16 manns.

Um ferðina
Við skiptum við vandaðan þjónustuaðila og allt starfólk og aðbúnaður er til fyrirmyndar. 
Matur er almennt góður í ferðinni og hreinlæti gott.  Við höfum góðan tíma til þess að kynnast borginni Cusco, skoðum Maras saltnámurnar, hinn fallega bæ Ollantaytambo og fleiri staði í hinum heilaga dal Inkanna. 
Við lengjum gönguleiðina og göngum í 4 daga áður en við komum inn á Inkastíginn sjálfan.  
Mörgum finnst upplifunin af þröngum dölunum með búsetu heimamanna þar sem við erum ein á ferðinni ekki síðri heldur en Inkastígurinn sjálfur. 
Þegar við komum inn á Inkastíginn stillum við það af þannig að við komum inn í miðja fyrstu dagleiðina og gistum þar sem flestir taka hádegismat.  Þannig verðum við síður vör við þá fólksumferð sem er á stígnum.  Við höfum síðan heilan dag til þess að skoða Machu Picchu og höfum ferð á útsýnisfjallið Huayna Picchu innifalið í ferðinni.  
Gengið er með létta dagpoka og farangur borinn á milli tjaldsvæða.  

Erfiðleikastig ferðarinnar
Ferðin er erfið gönguferð með allt að 1.100 m hækkun á dag.  Hæðin yfir sjávarmál gerir gönguna erfiðari, en við höfum rúma dagskrá og flestir ættu að vera búnir að aðlagst hæðinni þegar við komum inn á Inkastíginn sjálfan.  Í fyrri hluta göngunnar, þegar gengið er um byggðir heimamanna, höfum við hesta með í för.  Ef þess er óskað þá er hægt að setjast á bak og starfsfólkið okkar teymir hestinn yfir hæstu fjallaskörðin.

Til þess að staðfesta ferðina þarf að geiða 70.000 kr staðfestingargjald sem fer í að kaupa leyfi fyrir Inkastíginn.
Takmarkaður fjöldi leyfa er gefinn út fyrir hvern dag og mikil eftirspurn eftir þeim. Því þarf að bóka ferðina með góðum fyrirvara. Leyfisgjaldið er því miður ekki endurgreitt þó viðkomandi hætti við ferðina og ekki er hægt að nafnabreyta leyfunum á stíginn.
Ferðin verður ekki staðfest fyrr en lámarksþátttöku er náð og staðfestingargjald endurgreitt ef það næst ekki.

Eftirstöðvar koma til greiðslu 2 mánuðum fyrir brottför.
Staðfestingargjald er greitt inn á reikning:
370-26-490325, kt. 490321-0470
og senda kvittun á info@slod.is

Dagskrá ferðar:

Dagur 0 - Flogið frá Íslandi.

Dagur 1 - Koma til Cusco höfuðborgar Inkanna.
Staðarleiðsögumaður tekur á móti hópnum og farið er á gott 4ra stjörnu hótel í miðbæ Cusco þar sem dvalið er fyrstu tvær næturnar.
Cusco er í 3.400 metra hæð og viðbúið að þátttakendur finni fyrir hæðinni.  
Gist á Hóteli í  Cusco, kvöldverður ekki innifalinn.

Dagur 2 - Skoðunarferð um Cusco og nágrenni.
Eftir morgunverð er haldið af stað í skoðunarferð um borgina Cusco og nágrenni hennar.
Cusco býr yfir mikilli sögu og hvarvetna má sjá leifar af menningu og byggingum Inkanna ásamt byggingum frá spænska nýlendutímanum.
Meðal áfangastaða er Sacsayhuaman virkið sem stendur hátt yfir Cusco með fallegu útsýni yfir borgina. Umfangsmiklar hleðslur og gríðarleg björg sem eru listilega felld saman hafa skipað staðnum sess á heimsminjaskrá UNESCO. Gengið er upp í 3.700m hæð sem er ágætis hæðaraðlögun fyrir næstu daga.
Gist á hóteli í Cusco, hádegis- og kvöldverður ekki innifalinn.

Dagur 3 - Akstur um helgan dal Inkanna, Maras saltnámurnar og rústir Ollantaytambo.
Eftir morgunverð er ekið af stað eftir Urubamba dalnum, hinum helga dal Inkanna.
Þegar vegurinn hlykkjast upp úr dalnum fáum við fyrstu sýn á há fjöllin, Vilcabamba tindana, Salkantay og Huayanay.
Fyrsta stopp er Moray, en þar má sjá leifar einna elstu landbúnaðartilrauna sem þekktar eru. Risastórar spírallaga holur sem grafnar voru niður í jörðina, stall eftir stall. Allt að 15° hitamunur var á efsta og neðsta stalli og talið er að Inkarnir hafi gert tilraunir með hvaða tegundir plantna þrífast við hvaða aðstæður.  Þaðan er ekið að miðalda þorpinu Maras og gengið að umfangsmiklum saltnámum sem hafa verið starfræktar allt frá tímum Inkanna. Frá Maras er stuttur akstur að þorpinu Ollantaytambo, þar sem gist er. Ollantaytambo er einstaklega fallegur bær, grunnmynd hans og hleðslur eru frá tímum Inkanna og í hlíðunum fyrir ofan bæinn hvílir virki þar sem Inkarnir unnu eina af fáum orustum gegn spænska innrásarliðinu.
Gist á hóteli í Ollantaytambo, kvöldverður ekki innifalinn.

Dagur 4 .  Fyrsti göngudagur,  Parpishu, Huata og til Chillipahua (3.740m)
Við hefjum daginn á því að ganga upp að tilkomumiklu rústunum fyrir ofan Ollantaytambo og gefum okkur góðan tíma í að skoða þær áður en við færum okkur til og ökum stutta leið að Parpishu göngubrúnni, upphafstað göngunnar.  Gangan er á fótinn þar sem við hækkum okkur frá dalbotninum upp í um 3.800m hátt Watuq´asa skarðið.  Í skarðinu eru fornar Inka rústir, leifar stjórnsýslu og birgðageymsla.  Við borðum hádegismat í skarðinu og njótum útsýnisins til Cusco og nærliggjandi fjalla.  Við höldum að mestu hæð og fylgjum einstígum í hlíðinni uns við náum botni Tranquil dalsins. 
Næturstaður okkar í litlu þorpi,  Chilipahua.
Gist í tjöldum og allur matur innifalinn.
Göngutími um 6 klst, vegalengd um 11km - hækkun 750m / lækkun 215m.

Dagur 5. Gengið yfir Chi Chusqasa skarðið (4.520m) og niður til Ancascocha í Silque dalnum (3.950m).
Í dag er mesta hækkun ferðarinnar, en gengið er upp í Chi Chusqasa skarðið sem er 4518m hátt og gætu margir fundið fyrir hæðinni þegar farið er yfir skarðið. Við verðum með hesta sem fylgja hópnum og höfum möguleika að setjast á bak hesti sem teymdur er yfir há skarðið. Úr skarðinu er fallegt útsýni yfir djúpa dali og bratta skógivaxna hryggi og snæviþaktan tind Nevado Moyoc andspænis í dalnum. Við lækkum okkur niður í Silque dalinn og tjöldum við þverdal með útsýni upp á jökul krýnda fjallstoppa Nevado Huayanay.    
Tjaldsvæðið kallast Ancascocha eftir stöðuvatni sem er þar fyrir ofan.
Gist í tjöldum og allur matur innifalinn.
Göngutími 7 klst, vegalengd um 11km - hækkun 900m / lækkun 690m.

Dagur 6. Gengið niður Silque dalinn til Camicanca (2.850m).
Gangan niður Silque dalinn er falleg og yfir honum gnæfir tindurinn Veronica 5.700m hár. Gangan er fjölbreytt, farið yfir litlar brýr og þröng gljúfur. Heimamenn, Quechua fólkið, er með húsdýr á beit í dalnum og seljabúskap efst en varanlega búsetu neðar í dalnum. Það hlýnar eftir því sem við komum neðar og það er gaman að sjá hvernig gróðurfarið breytist.
Gist í tjöldum og allur matur innifalinn.
Göngutími um 5 klst, vegalengd um 12km - hækkun 170m / lækkun 1.200m.

Dagur 7. Camicanca til Chamana (2.600m).
Okkur er skutlað stuttan spöl niður með Urubamba ánni. Flestir hópar sem ganga Inka stiginn fara yfir ánna við “Km 82” en við förum aðeins lengra niður með ánni áður en förum yfir hana og höldum upp dalinn. Þannig náum við að vera í minni fólksumferð bæði þennan dag og daginn á eftir. Tjaldsvæðið okkar í er í litlu þorpi sem tilheyrir Llaqtapata samfélaginu. Í eftirmiðdaginn getum við skoðað Wayna Q´ente og Llaqtapata rústirnar með steinveggjum, tröppum og fleiri gömlum mynjum Inkana. Þetta er þægilegur dagur og það er kærkomið að komast í heita sturtu í tjaldstæðinu.
Gist í tjöldum og allur matur innifalinn.
Göngutími um 4.5 klst, vegalengd um 10km - hækkun og lækkun um 150m.

Dagur 8. Frá Paucarcancha rústunum að Llulluchapampa (3.760m).
Í dag komumst við inn á hinn eina sanna Inkastíg.  Við göngum fram hjá ökrum og strjálli byggð smábænda að þorpinu Huayllabamba. Þar eykst brattin og við göngum gegnum “skýja skóg” (claud forest) að tjaldstæðinu við Llulluchapampa. Njótum útsýnis á Huayanay tindinn og í nærumhverfinu getur að líta ólíkar tegundir af orkideum og eitthvað af þeim 250 tegundum kólíbrífugla sem finnast i Machu Picchu þjóðgarðinum.
Gist í tjöldum og allur matur innifalinn.
Göngutími um 7 klst, vegalengd um 12km - hækkun um 1.200m.

Dagur 9. Frá Llulluchapama að Phuyuoatamarca (3.660m).
Við höldum upp í skarðið Huarmiwanusca (4200 m), oft kallað “Dead woman's pass”, þaðan er gott útsýni yfir Huayanay tindinn til suðurs og Pacaymayo dalsins til vesturs. Við höldum niður dalinn, eftir 2ja tíma göngu hækkum við okkur aftur upp í næsta skarð, Runccuracay (3985m). Á leiðinni förum við fram hjá lítilli krá heimafólks og snæðum nestið hjá henni.
Hér víkar stígurinn og erum við nú komin á hinn upprunalega Inkastíg sem hlykkjast í gegnum skóglendið. Við göngum þrepin 98 að Sayacmarca, útsýnisstað sem er áhrifarík Inka rúst með útsýni til Aobamba dalsins sem liggur uþb 2000m fyrir neðan okkur. Við lækkum okkur og förum fram hjá Qonchamarca áður en við hefjum gönguna upp í þriðja skarð dagsins sem liggur líka gegnum skóg og forn Inka göng. Áfangastaðurinn er Phuyupatamarca (3680m).
Gist í tjöldum og allur matur innifalinn.
Göngutími um 8 klst, vegalengd um 13km - hækkun 1115m / lækkun 1195m.

Dagur 10 - Frá Phuyupatamarca til Machu Picchu.
Við vöknum snemma og höldum upp fyrir tjaldstaðinn til þess að ná sólarupprásinni á Salkantay (6.271m) og leggjum svo af stað til Machu Picchu eftir að hafa kvatt heimafókið sem hefur séð um að þjónusta okkur á göngunni.
Leiðin liggur niður 3.000 þrep að Inka rústunum Winay Huayna, sem kennt er við eilífa æsku. Áfram er haldið og eftir u.þ.b. klukkutíma lækkun og 30 mínútna hækkun komum við að Inti Punku - sólarhliðinu, þaðan sem við sjáum Machu Picchu í fyrsta skipti, sjón sem á trúlega eftir að lifa með okkur. Við höldum gegnum sólarhliðið og lækkum okkur niður fyrir Machu Picchu og tökum rútu í bæinn Machu Picchu (2.030m) þar sem við gistum á hóteli. Í bænum sem hét áður Aguas Calientes (heitt vatn) er að finna hverasvæði. Eins er hér fjöldi veitinga- og ölhúsa  þar sem hægt er að fagna göngulokum.
Gist á hóteli í 2ja manna herbergjum og allur matur innifalinn.
Göngutími um 5 klst, vegalengd um 11 km - hækkun 245m / lækkun 1.485m.

Dagur 11 - Machu Picchu.
Við tökum daginn snemma og fáum rútu upp til Machu Picchu til hafa nægan tíma til að skoða svæðið. Með í för er staðarleiðsögumaður sem leiðir okkur um hina tilkomumiklu “gleymdu” borg Inkanna.
Fyrir þá sem hafa áhuga á því er hægt að bæta við upplifun dagsins að klífa upp Huayna Picchu-tindinn, sem þýðir „Ungi tindurinn“ á Quechua-málinu. (Machu Picchu þýðir „gamli tindurinn“). Inkarnir lögðu stíg upp hlíðar Huayna Picchu, og byggðu musteri og verönd á tindi hans, sem er í um 2.720m hæð. Þaðan er flott útsýni og annað sjónarhorn yfir Machu Picchu svæðið.
Eftir heimsóknina í Machu Picchu er hádegisverður á veitingastað áður en lestin er tekin til Ollantaytambo í hinum helga dal og þaðan rúta yfir skarðið til Cusco, þar sem dvalið er næstu tvær nætur á sama hóteli og í upphafi ferðar.
Gist á hóteli í 2ja manna herbergjum, morgun- og hádegisverður innifalinn, en kvöldverður ekki. 

Dagur 12 - Cusco.
Frjáls dagur í Cusco.
Gist á hóteli í 2ja manna herbergjum með morgunverð, hádegis- og kvöldverður ekki innifalinn.

Dagur 13 - Heimferð. 
Akstur á flugvöll í Cusco.

Innifalið í verði:
Undirbúningsfundur með leiðsögumanni fyrir brottför.
Íslensk leiðsögn.
Ráðleggingar varðandi flug.
Akstur til og frá flugvelli í Cuzco fyrir þá sem taka viðmiðunarflugleið.
Hótel með morgunverði í Cuzco í 4 nætur.
Skoðunarferð um Cuzco og nágrenni.
Hótel í Ollantaytambo í eina nótt.
Hótel með kvöldverð í Machu Picchu í eina nótt.
Enskumælandi staðarleiðsögumenn.
Leyfisgjöld og aðgangur í Machu Picchu þjóðgarðinn.
Gönguleyfi á Huayna Picchu tindinn.
Allur matur og gisting í tjöldum á göngunni í 6 nætur.
Flutningur á farangri á meðan á göngu stendur.
Lyfjakista með sérhæfðum lyfjum.

Ekki innifalið í verði:
Flug til og frá Cuzco.
Matur í Cuzco, annar en morgunverður.
Kvöldverður í Ollantaytambo.
Þjórfé til heimamanna.
Persónuleg eyðsla eins og drykkir.